ټرمپ: ایران سره مو رغنده خبرې کړي او د انرژۍ په تاسیساتو به یې بریدونه پنځه ورځې وځنډول شي

د متحدو ایالتونو ولسمشر ډونالډ ټرمپ وايي چې په تېرو دوو ورځو کې یې د «ایران له هېواد» سره «ډېرې ښې او ګټورې» خبرې کړيدي.

ولسمشر ټرمپ نن دوشنبه (مارچ ۲۳) په خپل ټروټ سوشېل کې ولیکل: «خوشحال یم چې خبر درکوم د امریکا متحدو ایالتونو او د ایران هېواد په تېرو دوو ورځو کې په منځني ختیځ کې زموږ د دوښمنیو د بشپړ او هر اړخیز حل په اړه ګټورې او ښې خبرې درلودې...»

ولسمشر ټرمپ لیکلي دي چې دا خبرې اترې به د اونۍ په اوږدو کې هم روانې وې.

هغه لیکلي دي: «...د دغو ژورو، دقیقو او رغوونکو خبرو اتروې لهجې او انداز ته په کتو مې د متحدو ایالتونو د جګړې وزارت ته لارښوونه کړې چې د ایران په اتومي بټیو او د انرژۍ په تاسیساتو باندې هر ډول او ټول بریدونه د پنځو ورځو لپاره وځنډوي» او له هغه وروسته وضعیت به د «روانو خبرو او غونډو په کامیابۍ» پورې تړلی وي.

ولسمشر ټرمپ د شنبې په ورځ (مارچ۲۱) د ایران رژیم ضرب الاجل وټاکه او ویې ویل که د هرمز تنګي په بشپړ ډول بېرته خلاص نه شي، د ایران د انرژۍ تاسیسات به ختم کړي.

هغه په خپل ټروټ سوشېل کې لیکلي وو که «ایران له همدې شېبې څخه په راتلونکو ۴۸ ساعتونو کې د هرمز تنګی په بشپړه توګه او پرته له کوم ګواښ پرته بېرته خلاص نه کړي، متحده ایالتونه به د هغه هیواد بېلابېل برېښنايي تاسیسات په نښه او ختم کړي او پیل به یې» له تر ټولو سترو تاسیساتو څخه کوي.

ولسمشر ټرمپ د دوشنبې په ورځ، فلوریډا کې واشنګټن ته تر بېرته ستنېدو مخکې، خبریالانو ته وویل چې د هغه ځانګړي استازي سټیف ویتکاف او سلاکار جیرډ کوشنر د یکشنبې په ورځ له خپلو مذاکره کوونکو اړخونو سره غږېدلي دي.

ولسمشر ټرمپ وویل چې شاید خبرې د دوشنبې په ورځ هم د تیلیفون له لارې دوام ومومي، څکه چې د هغه په خبره بهر ته د ایران د استازو سفر سخت دی.

ولسمشر ټرمپ ټینګار وکړ چې د ایران سره هره هوکړه باید دا شرط ولري چې باید د یورانیمو غني کول بند کړي، د توغندیو پروګرام محدود کړي او له خپلو ګاونډیانو سره سوله ییزې اړیکې ولري.

ولسمشر ټرمپ دا هم وویل چې امریکا به د ایران له مشر مجتبی خامنه‌يي سره، چې د خپل پلار علي خامنه يي ځای ناستی ټاکل شوی، خبرې ونه کړي.

ډونالډ ټرمپ زیاته کړه چې د مجبتی خامنه يي د زخمي کېدو له راپورونو وروسته متحده ایالتونه نه شي تائیدولای چې هغه ژوندی دی که نه.

متحدو ایالتونو او اسرائیل د فبرورۍ په ۲۸مه نېټه په ایران باندې عملیات پیل کړل. د متحدو ایالتونو پوځ وايي چې د «حماسي غضب» په دغو عملیاتو کې یې د ایران رژیم مشرتابه، پوځي ځواک، هوايي ځواک، سمندري ځواک او نور مهم تاسیسات په نښه کړي او عملیات بریالي روان دي.

متحده ایالتونه او متحدین یې هڅه کوي چې د هرمز مهم تنګي لاره پرانیستې وي او تیل او نور اکمالات په کې اسان او له کوم خطر پرته وشي.

ولسمشر ټرمپ له خپلو متحدینو څخه هم غوښتي چې د هرمز تنګي په پرانیستلو کې ورسره مرسته وکړي، ایران وايي دا لاره یې تړلې او ګواښ یې کړی که هرې بېړې پرې تېره شوي، وبه وېشتل شي.