د لاس رسي وړ اتصالات

ترکیه غواړي له سعودي عربستان سره خپل روابط بېرته عادي کړي 


د ترکیې ولسمشر رجب طیب اردوغان

د ترکیې ولسمشر رجب طیب اردوغان نن چهارشنبه فبروري‌۱۶ (سلواغه ۲۷) وویل چې له سعودي عربستان سره «مثبتو خبرو» ته دوام ورکوي او د اړیکو د لا ښه کولو لپاره به په راروانو څو ورځو کې ثابت ګامونه اوچت کړي.

د ریاض او انقرې تر منځ روابط په ۲۰۱۸ په استانبول کې د سعودي عربستان په قونسلګرۍ کې د دننه د عرب خبریال جمال خاشقجي له وژل کېدو وروسته خراب شول.

رویټرز خبري‌ اژانس وایي چې ښاغلي اردوغان نن له متحدو عربو اماراتو څخه ترکیې ته په لار خبریالانو ته وویل: «موږ له سعودي عربستان سره خپل مثبت ډيالوګ [خبرې اترې] روان ساتو او په دې لړ کې به ثابت ګامونه واخلو. موږ غواړو چې دا بهیر مثبت لوري ته برابر کړو.»

ترکیې د جمال خاشقجي د قتل په قضیه کې د سعودي عربستان د شهزاد محمد بن سلمان او ځینو نورو چارواکو، چې په دغې قضیې کې تورن بلل کېدل، محاکمه کېدل غوښتل. خو سعودي یې په غبرګون کې په غیر رسمي ډول د ترکیې له مالونو او توکو سره پریکون او بایکاټ وکړ.

سعودي عربستان همدغه راز په ۲۰۲۰ کې د خاشقجي د قتل په تور اته کسان په ۲۰ او اوو کلونو بند محکوم کړل. ترکیه ظاهرآ په دې پرېکړې خوشحاله نه وه او هغه وخت یې ویلي ‌وو چې د داسې یوې پرېکړه تمه نه کېده.

انقرې د خلیج هېوادونو سره د خپلو اړیکو د بیا رغولو لپاره، د سعودي عرستان له دغې پرېکړې ورسته، خپله لهجه نرمه کړه او ټېنګار یې کاوه چې له سعودي عربستان سره کومه ستونزه نلري.

XS
SM
MD
LG