بریتانیا د مارچ ۳۰ (وري لسمه) له افغانستان سره د مهمو خوراکي موادو او نورو مرستو لپاره د ۳۷۴ میلیونو ډالرو مرستې اعلان وکړ.
دغه مرسته په داسې حال کې اعلان شوه چې ټاکل شوېده مرسته کوونکي د پنجشنبې په ورځ مارچ ۳۱ په داسې حال کې افغانستان سره د مرستې په اړه غونډه جوړه کړي چې د طالبانو د حکومت د کړنو په اړه اندیښنې زیاتې شوي دي.
ملګرو ملتونو له افغانستان سره د مرستي په هدف د ۴.۴ میلیاردو ډالرو غوښتنه کړیده.
د بریتانیا د بهرنیو چارو وزیرې لیز تراس وویل:" له خپلو متحدینو او شریکانو سره یوځای کولای شو له افغانستان سره د مرستې په هدف ډیر کارونه وکړو او ترسره به یې کړو."
د افغانستان لپاره د ۴.۴ میلیاردو مرسته هغه ستر رقم دی چې ملګري ملتونه یې د لومړي ځل لپاره د یوه هیواد لپاره غواړي. د ملګرو ملتونو ویاند ویلي دي چې تر اوسه یې ۱۳ سلنه دغه تقاضا پوره شوې ده.
ملګرو ملتونو ویلي چې دغه پیسې به په افغانستان کې د ملګرو ملتونو د اداراتو له خوا په مصرف ورسیږي او طالبان به ورته لاسرسی ونلري.
ټاکل شویده د ملګرو ملتونو سرمنشي انتونیو ګوتیریش دغه انلاین غونډه له ژنیف څخه په داسې حال کې رهبري کړي چې د نړۍ هیوادونه د طالبانو له خوا په افغانستان کې د ښوونځیو د تړل کیدو په اړه اندیښمن دي.
ملګري ملتونه چې له بریتانیا، جرمني او قطر سره یوځای ددې غونډې کوربتوب کوي ویلي دي چې د افغانستان کابو ۲۳ میلیونه وګړي سخته لوږه تجربه کوي او د هغه هیواد ۹۵ سلنه اوسیدونکي کافي خوراکي توکي نلري.
ملګرو ملتونو همدارنګه ویلي دي چې لس میلیونه افغان ماشومان د ژوندي پاتې کیدو لپاره فوري مرستو ته ضرورت لري.
د ناروې د مهاجرت د شورا منشي یان ایګلانډ مرسته کوونکو هیوادونو ته په خطاب کې وویل دا غونډه ددې لپاره یو فرصت دی چې وښیو په تیارو ساعتونو کې د افغانانو سره ولاړ یو.
مرسته کوونکي په داسې حال کې د پنجشنبې په ورځ له افغانستان سره د مرستو په هدف غونډه کوي چې د طالبانو رئیس الوزرا محمد حسن اخند د تیر کال په نومبر میاشت کې وویل چې طالبان د افغانستان بیوزلو ته د خوړو د برابریدو مسولیت نلري.
هغه خلکو ته وویل "د رزق ژمنه خدای ج کړې ده" او خلک باید د بغارو په کولو سره له خدای څخه مرسته وغواړي.
کارپوهان وایي چې د افغانستان اوسنی وضعیت تلپاتې ندی ځکه له افغانستانس سره به د مرسته کوونکو مرستې بالاخره کمې شي، په ځانګړې ډول کله چې کوربه هیواد د مسولیت حس ونکړي.
