د لاس رسي وړ اتصالات

د برما پوځ د امریکا له یو بانک څخه د یو میلیارد ډالرو ایستلو هڅه کړې


د برما پوځ د ۲۰۲۱ کال د فبروري په میاشت کې کودتا وکړله او واک یې تر لاسه کړ.

د برما پوځي واکمنانو کوښښ کاوه د امریکا د نیو یارک ایالت د مرکزي بانک نه خپل شاوخوا یو میلیارد ډالر وباسي خو امریکایي چارواکو یې مخه نیولې ده.

امریکا وروسته تر هغه دننه په امریکا کې د برما د پوځ شتمنې کنګل کړه چې د د تېرې میاشتې په لومړۍ نیټې یې د پوځي کودتا د لارې د هیواد مشره آنګ سان له واکه لیرې کړله او د هیواد چارې پوځ په لاس کې واخیستې.

د امریکا د حکومت یوې سرچینې چې د موضوع په اړه معلومات لري، ویلي چې د پیسو د ایستو دا هڅه د فبروري د میاشتې په څلورمه نیټه د برما د مرکزي بانک په نامه شوې وه خو د امریکا د مرکزي بانک حفاظتي تدابیرو یې مخه نیولې وه.

وروسته امریکایي چارواکو د دې پیسو په انتقال بندیز ولګاوه او وایي د جمهور رئیس جو بایډن اجرائیوي فرمان ته انتظار کوي چې له مخې به یې هغوي وکړی شي دا پیسې په قانوني توګه د تل لپاره د دوران نه وغورځوي.

معلومه نده چې د نیویارک ایالت په مرکزي بانک کې دا پیسې د چا په نامه دي. د امریکا د خزانې وزارت او د نیویارک مرکزي بانک هم پدې اړه د معلوماتو د ورکولو نه ډډه کړې.

د رویټرز خبري اژانس څو ځله هڅه کړې چې د موضوع په هکله د برما د پوځ د ویاند سره وغږیږي خو پوځ ټیلیفون ته ځواب ندی ویلی او د برما مرکزي بانک سره هم د اړیکې نیولو هڅې ناکامه شوي.

ویل کیږي چې د برما پوځ وروسته تر هغه د دې پیسو د ایستلو هڅه کړې وه چې د پوځي کودتا نه وروسته یې د مرکزي بانک نوی رئیس وټاکه او پخوانی رئیس یې چې یو اصلاح غوښتونکی شخص و، ونیوه او بندي یې کړ.

په برما کې د پوځي کودتا او د کودتا نه وروسته د مظاهره چیانو د ځپلو په غبرګون کې د امریکا متحده ایالاتو، کاناډا، اروپایي اتحادیې او برتانیې د هغه هیواد په پوځ تازه بندیزونه ولګول.

ملګرو ملتونو ویلي چې پوځ او پولیسو د پوځي کودتا راپدیخوا لږ تر لږه ۵۴ کسان وژلي او د ۲۹ خبریالانو په ګډون یې د ۱۷ سوو نه ډیر بندیان کړیدي.

XS
SM
MD
LG