د لاس رسي وړ اتصالات

امریکايي چارواکي: له طالبانو سره خبرو کې پرمختګ شوی


Rodney Hunter

د امریکا متحده ایالتونه وايي له طالبانو سره په خبرو کې پرمختګونه شوي دي چې کولای شي له یادې ډلې سره د هوکړې د لاسوند نهايي کیدو ته زمینه برابره کړي.

په ملګرو ملتونو کې د امریکا د سیاسي چارو همغږي کوونکي روډني هنټر ویلي چې په دې لاسوند کې به د طالبانو دا تعهد هم وي چې د افغانستان له خاورې څخه به د بل هیڅ هیواد په وړاندې کار نه اخلي.

ښاغلي هنټر چې د ملګرو ملتونو د امنیت شورا په غونډه کې خبرې کولې وویل،”ددغه لاسوند تر نهايي کیدو وروسته به په افغانستان کې د امریکايي ځواکونو د حضور په څرنګوالي بحث پیل شي. خو هغه ټینګار وکړ چې په افغانستان کې به د بهرنیو ځواکونو حضور د افغانستان د وضعیت له څرنګوالي سره تړاو ولري. “

هغه وویل: "امریکا له طالبانو سره په خبرو کې له ترهګرۍ سره د مبارزې په برخه کې پرمختګ کړی دی او ممکن ډیر ژر د داسې یو متن لاسوند جوړ شي چې د طالبانو تعهدات همپکې شامل وي."

د طالبانو یو ویاند د سه شنبې په ورځ په خپل ټویټر کې لیکلي وو چې له امریکا سره په خبرو کې له افغانستان څخه د بهرنیو ځواکونو په وتلو هوکړه شوې ده خو دا څرګندونې د افغانستان د سولې لپاره د امریکا د ځانګړي استازي زلمي خلیلزاد له خوا رد شوې وې.

ښاغلي هنټر زیاته کړه: " امریکا طالبانو ته روښانه کړې چې په افغانستان کې د خپل نظامي حضور کمیدو ته چمتو ده خو د پوځیانو د شمیر او یا هم د وتلو د مهال ویش پر سر هوکړې ته لا نه یو رسیدلي. د بهرنیو ځواکونو په اړه وروستۍ پریکړه له دولت او د سولې سره کیږي."

چین ته د طالبانو د پلاوی سفر

ددغه امریکايي ډیپلومات څرګندونې په داسې حال کې بیانیږي چې د امریکا د وسله والو ځواکونو لوی درستیز جنرال جوزف ډانفورډ څه موده وړاندې ټینګار کړی وو چې تر هغه پورې چې د تروریزم مشکل نه وي هوار شوی ، امریکايي ځواکونه به افغانستان پرې نږدي.

په هغو خبرو اترو کې چې امریکا له طالبانو سره پیل کړي پر څلورو موضوعاتو باندې بحث شوی چې په کې، د بل هیڅ هیواد په وړاندې د افغانستان د کارولو په اړه د طالبانو ډاډ، په افغانستان کې د بهرنیو ځواکونو د حضور څرنګوالی، بین الافغاني مذاکرات او دوامداره اوربند شامل دی.

بلخوا د چین د بهرنیو چارو وزارت اعلان کړی چې روانه اونۍ د طالبانو د یوه پلاوي کوربه وو.

د چین د بهرنیو چارو وزارت ویاند لو کانګ وویل چې په قطر کې د طالبانو د سیاسي دفتر رئیس ملا برادر او د طالبانو د ډلې یو شمیر نورو غړو چین ته په سفر کې ددغه هیواد له چارواکو سره خبرې کړي دي.

هغه ددغه سفر دقیق وخت په اړه څه ونه ویل.

XS
SM
MD
LG