په اسرائیل او متحده عربي اماراتو د ایران د توغندیو د بریدونو دویمه ورځ
د ایران رژیم د دوهمې پرله پسې ورځې لپاره پر اسرائیل او متحده عربي اماراتو د توغندیو او ډرون بریدونو ته دوام ورکړ. په دې بریدونو کې یو توغندی چې پر اسرائیل ولګېد، نهه ملکي وګړي پکې ووژل شول، چې تر دې دمه د سیمې د روانې شخړې تر ټولو مرګونی ایراني برید بلل کېږي.
اسرائیلي رسنیو راپور ورکړی چې د یکشنبې په ورځ د ایران له خوا یو توغندی د اسرائیل د مرکزي ښار بیت شمش په یو پناه ځای ولګېد. لږ تر لږه نهه کسان ووژل شول او څه باندې شل تنه نور ټپیان شول، د توغندي د لګیدو له امله دغه پناه ځای او څو نږدې کورونه ویجاړ شول.
د امریکا د متحدو ایالتونو ولسمشر ډونالډ ټرمپ څو ساعته وروسته له دې چې د علي خامنهاي د وژل کیدو خبر تائيد شو، د ايران د رژيم پوځي ځواکونه وګواښل چې که هر ډول بريد ترسره کړي، نو د امريکا د متحده ايالتونو له لوري به له لا ډېر سخت ځواب سره مخ شي.
ولسمشر ټرمپ د «ټروت سوشيل» په ټولنيزه شبکه کې په خپل پيغام کې وليکل:
«ايران تازه اعلان کړی چې نن به ډېر سخت بريد ترسره کړي، تر بل هر وخت سخت. خو غوره دا ده چې داسې کار ونه کړي، ځکه که دا کار وکړي، موږ به په د داسې قوت سره ځواب ورکړو چې تر دې مخکې هېڅکله نه دی ليدل شوی.»
د امریکا د متحدو ایالتونو د جنګ وزیر پیت هیګسیت د ایران د رژیم په وړاندې د امریکا او اسراییل ګډ عملیات په تاریځ کی تر ټولو "وژونکي، پیچلي او دقیق" عملیات وبلل.
د جنګ وزیر د ایکس په ټولنیزې شبکې کې ولیکل چې ایران یوې موافقې ته د رسیدو فرصت درلود خو له هغه څځه یې ډډه وکړه او اوس یې بیه پرې کوي. هغه ولیکل: دا جګړه متحدو ایالتونو پیل نه کړه، خو سر ته به یې ضرور ورسوي."
د ایران پر تاسیساتو د امریکا او اسراییلو له بریدونو وروسته، د فارس خلیج د ځینو هیوادونو په وړاندې د تهران غچ اخیستونکو غبرګونونو د عربي حکومتونو ترمنځ د نارضایتۍ څپه رامینځته کړې او د ایران پر وړاندې د سیمه ییزې جبهې د جوړولو نښې یې راپارولي دي.
ایران تر اوسه پورې په قطر، بحرین، متحده عربي اماراتو او کویټ د توغندیو بریدونه کړي دي، او ادعا کوي چې په سیمه کې د امریکا پوځي اډې په نښه کوي.
سعودي عربستان پر عمان د ایران برید وغانده او په هغو اقداماتو کې یې د عمان سره د "بشپړ پیوستون" اعلان کړ.
