د امریکا د متحدو ایالتونو ولسمشر ډونالډ ټرمپ وایي چې د ایران نوي مشران باید ددې نه مخکې چې ناوخته شي، ژر تر ژره دې له امریکا سره د یوې هوکړې لپاره جدي شي.
د امریکا د متحدو ایالتونو ولسمشر، ډونالډ ترمپ د ایران د انرژۍ د تولیدي تاسیساتو پر ضد د بریدونو ضربالاجل د اپریل تر ۶ مې نېټې پورې ځنډولی دی.
ولسمشر ترمپ د پنجشنبې په ورځ په خپل ټولنیز شبکې (ټروت سوشیل) کې لیکلي چې ایراني چارواکو د لا ډېر وخت غوښتنه کړې ده.
ترمپ لیکلي: "که هغوی هغه څه چې باید ترسره یې کړي، ترسره نه کړي، زه به د هغوی د انرژۍ تولیدي تاسیسات له منځه یوسم."
ایران پر خپلو ګاونډیو هېوادونو بریدونو ته دوام ورکوي او پدې وروستیو کې یې پر اردن، متحده عربي امارات، سعودي عربستان او اسرائیلو باندې توغندي توغولي دي، پداسې حال کې چې د دغه هېواد جګړه له متحدو ایالتونو او اسرائیلو سره روانه ده.
د متحده عربي اماراتو د دفاع وزارت د جمعې په ورځ په ټولنیزو رسنیو کې ویلي چې دوی د ایران له لوري توغول شوي ۶ بالستیک توغندي او ۹ بېپیلوټه الوتکې شنډې کړې دي.
د ایران توغندیو اردن، متحده عربي امارات او اسرائیل په نښه کړل
ټاکل شوې چې د امریکا د متحدو ایالتونو ولسمشر ډونالډ ټرمپ د چهارشنبې په شپه [اپرېل لومړۍ] د ایران سره شخړې په اړه ملت ته وینا وکړي. دا پداسې حال کې ده چې امریکایي چارواکي وایي د ۳۳ ورځو پوځي عملیات د "پای کرښې" ته نږدې شوي دي.
د سپینې ماڼۍ ویاندې کارولاین لېویټ وویل چې ولسمشر ټرمپ به د چهارشنبې شپې په مهمه وینا کې چې د امریکا د ختیځې برخې په وخت د شپې په ۹:۰۰ بجو اورول کېږي، د ایران په اړه “مهم معلومات” وړاندې کړي.
د ټرمپ د ادارې چارواکو ویلي چې د امریکا پوځ "په ښه مسیر" د خپلو موخو پر لور پرمختګ کوي چې د ایران د هوايي او سمندري ځواکونو له منځه وړل، او د ترهګر رژیم د توغندیو د توغولو وړتیا او فابریکو له منځه وړل هم پکې شامل دي.
