د افغانستان د بهرنیو چارو وزارت وايي چې د کابل، اسلاماباد او بیجینګ ترمنځ درې اړخیزه غونډه د پنجنشبې په ورځ د جون درېیمه (غبرګولي ۱۳) جوړېږي.
د دغه وزارت د ویاند مرستیال حامد تهذیب امریکا غږ ته وویل چې دا د درېو هېوادونو ترمنځ د غونډو څلورم پړاو دی او په انلاین توګه ترسره کېږي.
د ښاغلي تهذیب په وینا ټاکل شوې چې د افغانستان، پاکستان او چین د بهرنیو چارو وزیران د تېرو غونډو د پریکړو د تعقیبولو، د باور فضا د رامنځ ته کولو، د ګډو ستونزو د له منځه وړلو او له کروناویروس سره د مبارزې په اړه خبرې وکړي.
د افغانستان د بهرنیو چارو وزارت د ویاند مرستیال زیاته کړه چې له تروریزم سره مبارزه په افغانستان او سیمه کې د سولې ټینګېدل، د ترانسپورتي او سیمهییزو پروژو د تطبیقولو په برخه کې د همکاریو پراختیا هم د دغې غونډې په اجنډا کې شامل دي.
دا درې اړخیزه غونډه په داسې مهال جوړېږي چې د کابل او اسلاماباد ترمنځ اړیکې یو ځل بیا ترینګلې شوې دي.
د سیاسي چارو او نړیوالو اړیکو کارپوهان وايي چې د کابل او اسلاماباد ترمنځ د اړیکو ترینګلتیا او د افغان سولې په مذاکراتو کې رامنځ ته شوي خنډ ته په پاملرنې د دې غونډې جوړولو ته جدي اړتیا لیدل کېږي.
د باور غورځنګ مشر نجیبالله ازاد امریکا غږ ته وویل چې په دغې غونډه کې به تر ډېره د افغانستان او پاکستان ترمنځ د اړیکو په ښهوالي او په قطر کې د سولې د مذاکراتو په وړاندې رامنځ ته شوي خنډ باندې خبرې وشي.
خو د پوهنتون استاد فیض محمد ځلاند د کابل، اسلاماباد او بیجینګ په ګډون تیرو درې اړخیزو غونډو ته په اشارې وايي چې په راتلونکې غونډه کې به هم درې خواوې په یو لړ مسلو "یوازې د کاغذ پر مخ" توافق ته ورسېږي.
د ښاغلي ځلاند په وینا افغانستان تراوسه د چین او پاکستان سره په بحثونو کې د یو ځواکمن هېواد په توګه نه دی مطرح شوی او له همدې امله په درې اړخیزو غونډو کې د افغانستان غوښتنې جدي نه ګڼل کېږي.
د کابل، اسلاماباد او بیجینګ ترمنځ دا غونډه وروسته له هغې جوړېږي چې پاکستاني چارواکو د افغانستان د ملي امنیت له سلاکار حمدالله محب سره اړیکې پرې کړې دي.
د افغانستان د ملي امنیت سلاکار حمدالله محب دوه اونۍ وړاندې ننګرهار ته د خپل سفر په مهال په یوې غونډه کې په پاکستان تندې نیوکې وکړې او ویې ویل چې دغه هېواد "هیڅ عزت او ویاړ نه لري".
د پاکستان د بهرنیو چارو وزارت د مې په ۱۷مه په یو بیان کې د ښاغلي محب دا څرګندونې "غیر مسولانه او بېبنسټه تورونه" وبلل او زیاته یې کړه چې دا ډول څرګندونې د اسلاماباد او کابل تر منځ باور ته زیان رسوي.
د پاکستان د حکومت یو جیګپوړي چارواکي امریکا غږ ته وویل چې اسلاماباد به له دې وروسته د افغانستان د ملي امنیت له سلاکار سره دوه اړخیزې اړیکې ونپالي.
که څه هم تراوسه په دې اړه د پاکستان رسمي پریکړه د افغانستان له حکومت سره نه ده شریکه شوې خو ښاغلي محب ویلي چې له ده سره د اړیکو پرې کولو پر ځای پاکستان باید له تروریستي ډلو سره اړیکې پرې کړي.
پاکستان تل له تروریستي ډلو څخه خپل ملاتړ رد کړی او د دغه هېواد د بهرنیو چارو وزیر شاه محمود قریشي په خپلو وروستیو څرګندونو کې ویلي چې هېواد یې له طالبانو سره ښې اړیکې لري خو ورباندې کنټرول نه لري.