د افغانستان د کورنیو چارو وزارت سرپرست او د دفاع وزارت لوی درستیز د کندهار د امنیتي وضعیت ارزولو او د امنیتي ځواکونو د عملیاتو د څرنګوالې د ارزونې لپاره د یوه لوړپوړي پلاوي په مشرۍ نن سې شنبه دغه ولایت ته تللي دي.
د کورنیو چارو وزارت نن سه شنبه ویلي چې جنرال عبدالستار میرزکوال به د دې سفر په ترڅ کې د کندهار ولایت له نظامي او ملکي مشرتابه او همدارنګه د دې ولایت له مشرانو او متنفذینو سره وګوري.
د افغانستان دفاع وزارت هم په یوې اعلامیې کې ویلي چې په دغه پلاوي کې د دفاع وزارت لوی درستیز جنرال ولي محمد احمدي هم شامل دی.
بلخوا سیمه ییز چارواکي وايي، په کندهار کې د امنیتي پېښو په لړ کې تر درنو نښتو وروسته د دغه ولایت د میانشین ولسوالۍ له مرکز څخه هم تېره شپه ګډ افغان ځواکونه پر شا شوي.
د میانشین ولسوال رحمت الله اغا نن سه شنبه جولاۍ شپږمه (چنګاښ ۱۵) له امریکا غږ سره په خبرو کې تائید کړه چې د ولسوالۍ له مرکز څخه افغان ګډ ځواکونه را وتلي دي.
د جګړې له زیاتېدو سره سم د کندهار والي روح الله خانزاده ډاډ ور کوي چې امنیت به ټېنګوي.
نوموړي په یو ویدیويي پیغام کې ویلي دي چې د کندهار دامنیت لپاره ځانګړي تدابیر نیول شوي او د دې ولایت له اوسیدونکو يې غوښتي چي اندېښنه ونکړي.
