افغان امنیتي چارواکي وايي، په بغلان او کندز ولایتونو کې په دوو بېلابېلو عملیاتو کې د طالبانو له زندانونو ۴۷ زندانیان خوشي کړي دي.
افغان چارواکي وايي، دغه عملیات چې تېره شپه د افغان ځانګړو امنیتي او دفاعي ځواکونو لخوا تر سره شوي، په بغلان کې ۳۴ او په کندز کې ۱۳ تنه د طالبانو له زندانونو څخه خوشي شوي دي.
د افغانستان د کورنیو چارو وزارت ویاند نصرت رحیمي نن سې شنبې د غبرګولې پر۲۱مه ویلي چې په بغلان کې په خوشي شوو زندانیانو کې ۷ ملي اردو، ۷ پولیس، ۳ د ملي امنیت کارمندان او ۱۷ تنه ملکي وګړي شامل دي.
د افغانستان دفاع وزارت هم وايي، چې د افغان ځواکونو د پسرلینو عملیاتو له پیل نه بیا تر دې مهاله د ملکیانو او نظامیانو په ګډون نژدې ۴۰۰ زندانیان د طالبانو له زندان څخه ژغورل شوي دي.
د دفاع وزارت سرپرست ویاند زبیر عارف د سې شنبې په ورځ امریکا غږ ته وویل، افغان ځواکونه هڅه کوي چې د ورته عملیاتو پرمهال پاتې زندانیان هم د طالبانو له بند څخه خوشي کړي.
تر دې مخکې په افغانستان کې د ملګرو ملتونو مرستندویه دفتر یا یوناما هم له زندانیانو سره د طالبانو د چلند په اړه اندېښنه ښودلې وه.
په کابل کې د امریکا سفیر هم جان بس هم نن پر خپل ټوېټر د افغان سرتېرو لخوا د طالبانو له زندانونو څخه د بندیانو خوشي کول ستایلي دي.
هلمند، ارزګان، غزني، زابل، کندز، فاریاب او غور له هغو ولایتونو څخه دي چې په دې وروستیو افغان سرتېرو پکې د طالبانو زندانونه مات کړي دي.
طالبانو تر دا مهاله په دې اړه څه نه دي ویلي.
