د لاس رسي وړ اتصالات

ولې شاپور ځدراڼ شاهد اپریدي ته خپل تاریخي کمیس ورکړ


شاهد اپريدي په خپل ټویټر کې له شاپور او نورو افغان لوبغاړو مننه کړې ده

د افغانستان د کرکټ د ملي لوبډلې لوبغاړي شاپور ځدراڼ د پاکستان پښتون لوبغاړي شاهد اپریدي ته خپل تاریخي کمیس ډالۍ کړ.

پر دغه کمیس د شاپور ځدراڼ او د ملي لوبډلې د تقریبآ ټولو لوبغاړو امضاوې دي.

شاهد اپريدي په خپل رسمي ټویټر کې له شاپور او نورو افغان لوبغاړو مننه کړې چې د هغه د خیریه ټولنې او ښو کارونو ستاینه یې کړې ده. اپریدي د شاپور دا کار د خپلې خیریه ټولنې په ملاتړ یو نیګ ګام بللی دی.

د شاپور ځدراڼ ورور غمي ځدراڼ، چې په خپله هم د افغانستان د الف لوبډلې غړی دی، امریکا غږ اشنا ته وویل چې شاپور ځکه دا کار وکړ چې اپریدی یو پښتون لوبغاړی دی او تل یې ښه لوبه کړې ده.

غمي ځدراڼ وویل بل دلیل دا و چې اپریدی له کرکټ وروسته اوس خیریه کارونه کوي او شاپور غوښته چې له دغې لارې د هغه د نیکو کارونو ستاینه وکړي.

شاپور ځدراڼ د افغانستان کیڼ لاسی تېز توپ اچونکی دی، چې د خپلو وېښتو او منډو- رن اپ- له کبله هم مشهور دی.

اپریدي ته د شاپور ډالۍ شوی کمیس ځکه تاریخي بلل کیږي چې د جولاۍ په ۱۳ یې له ام سي سي سره په لوبه کې اغوستی و. شاپور په دغې لوبې کې درې لوبغاړي وسوځول.

د شاپور په په سوځېدلیو لوبغاړو کې د نیوزلنډ او پاکستان مخکني کپتانان برنډن مکولم او مصباح الحق هم شامل وو.

تر افغان لوبغاړي شاپور ځدراڼ مخکې د هند د ملي لوبډلې کپټان ویرات کوهلي هم خپل کمیس شاهد اپريد ته ډالۍ کړی و. د ویرات کوهلي په کمیس هم هندي لوبغاړو امضاوې کړې وې.

شاهد اپریدی د پاکستان د کرکټ د ملي لوبډلې مخکنی کپټان او لوبغاړی دی چې د خپلې تيزې لوبې له کبله خورا زیات مینوال لري.

  • 16x9 Image

    جعفر هاند

    جعفر هاند د هند په اندرا ګاندي پوهنتون کې په سیاسي علومو کې ماسټري کړې ده؛ د ننګرهار په پوهنتون کې یې قضا لوستې ده. له ۲۰۰۷ نه تر ۲۰۱۴ کاله پورې د بي بي سي د نړیوالې او افغان څانګې خبریال او پروډیوسر و. د ۲۰۱۴ کال له پیل راهیسې په واشنګټن کې د امریکا غږ اشنا راډیو/تلویزون خبریال دی.

     

XS
SM
MD
LG