د لاس رسي وړ اتصالات

راشد خان انګلش ګاونټۍ کې د لوبېدو لپاره د ویزې انتظار کوي


راشد خان د برتانیا د غوره لوبغاړو ویزې ته انتظار کوي

د برتانیا انګلش کاونټۍ ځینو لوبډلو د راشد خان د پېرېدلو هوډ کړی، خو اوس یې د کورنیو چارو وزارت د هغه سوابق پلټي.

د آی پي ال، بګ بش او ځینو نورو تجارتي سیالیو په څېر د انګلش کاونټي سیالۍ هم معتبري بلل کیږي او د نړۍ مشهور لوبغاړي په کې لوبیږي.

د برتانیا د کورنيو چارو وزارت د انګلش په کاونټۍ کې د هر لوبېدونکي بهرني لوبغاړي سوابق پلټي او بیا ورته د ویزې ورکولو او نه ورکولو پرېکړه کوي. که ویزه ورکړل شوه نو راشد خان به په ۲۰۱۸ کال کې په دغو سیالیو کې ولوبیږي.

برتانیا د انګلش په کاونټۍ کې هر بهرني ته د "غوره لوبغاړي" ویزه ورکوي چې تګ راتګ او سفر ورته اسانه وي، خو د سوابقو پلټل یې د ویزې مهم شرط بلل کیږي.

راشد خان لومړنی افغان دی چې د انګلش کاونټۍ ځینو لوبډلو یې د پېرېدلو هوډ کړی دی. خو د لوبډلو نومونه لا معلوم نه دي.

د فرانسې خبري اژانس وايي چې د انګلش په کاونټۍ کې ډېر لوبېدونکي لوبغاړي د کرکټ د نړیوالې شورا د لومړۍ درجې هېوادونو څخه دي، افغانستان هم اوس تازه د کرکټ د نړیوالې شورا بشپړ غړی شو.

تراوسه نه د افغانستان کرکټ بورډ او نه هم په خپله راشد خان په دې اړه څه ویلي دي. راشد خان له کور د باندې په اول ځل د بنګلدېش په کورنیو سیالیو کې له لوبېدو وروسته په ډېر لوړ قیمت د هند په آي پي ال سیالیو کې ولوبېده او وځلېده.

هغه د اګست په میاشت کې د ویسټ انډیز په کورنیو سیالیو کې هم لوبیږي او په یوې ځانګړې مرکې کې یې امریکا غږ اشنا ته ویلي وو چې د اسټرالیا د بګ بش ځینو لوبډلو هم ورته د لوبو وړاندیزونه کړي چې ښايي ورسره ولوبیږي.

۱۸ کلن راشد خان په یوې ورځنیو سیالیو کې د توپ اچونکو په درجه بندۍ کې اتم او د ۲۰ اورونو په سیالیو کې په څلورم مقام کې دی.

هغه په نړۍ کې څلورم بالر شو، چې په یوې لوبې کې اووه لوبغاړي وسوځول. ده د ویسټ انډیز خلاف لوبې کې دا ریکارډ جوړ کړ.

  • 16x9 Image

    جعفر هاند

    جعفر هاند په ۲۰۱۷ کې په واشنګټن ډي سي کې په امریکايي پوهنتون کې په نړیوالو مطبوعاتو او اړیکو کې ماستري کړې ده. لومړۍ ماستري یې په ۲۰۱۳ کال کې (له لېرې واټن- Distance Learning) د هند په اندرا ګاندي پوهنتون کې په سیاسي علومو کې کړې ده. د ننګرهار په پوهنتون کې یې قضا لوستې ده. له ۲۰۰۷ نه تر ۲۰۱۴ کاله پورې د بي بي سي د نړیوالې او افغان څانګې خبریال او پروډیوسر و. د ۲۰۱۴ کال له پیل راهیسې په واشنګټن کې د امریکا غږ اشنا راډیو/تلویزون خبریال دی. 

XS
SM
MD
LG