د لاس رسي وړ اتصالات

جلال اباد کې درې ورځې پرلپسې چاودنې کیږي او مرګ ژوبله اړوي


جلال اباد کې درې ورځې پرلپسې چاودنې کیږي او مرګ ژوبله اړوي
جلال اباد کې درې ورځې پرلپسې چاودنې کیږي او مرګ ژوبله اړوي

د افغانستان د کورنیو چارو وزارت وايي، نن سهار په جلال اباد ښار کې د سړک غاړې ماین چاودنې یو پولیس او یو ملکي وګړی وژلي دي.

دغه وزارت د دوشنبې په ورځ په یوې اعلامیې کې ویلي، چې دغه چاودنې پنځه نور ملکي وګړي ټپیان کړي هم دي.

د ننګرهار د والي ویاند عطاءالله خوګیاڼي هم د «وري میاشتې پر ۱۹مه» نېټه امریکا غږ ته وویل، چې چاودنه نن سهار څه باندې اووه بجې د جلال اباد ښار په دریمه ناحیه کې رامنځته شوې ده.

خوګیاڼي زیاته کړه، چې د چاودنې هدف د دغه ولایت د امنیې قوماندانۍ د مالي امر موټر و.

د ننګرهار چارواکي‌ بیا وايي، چې چاودنې ۷ تنه ټپیان کړي چې روغتیايي حالت یې د ډاډ وړ دی.

پر همدې مهال د جلال اباد ښار اوسېدونکي وروستیو چاودنو ته د اندېښنې په څرګندولو سره له ځايي چارواکو د امنیت په اړه د جدي‌ اقدماتو غوښتنه کوي.

د جلال اباد ښار اوسېدونکی احسان الله چې محصل دی امریکا غږ ته یې وویل: "دا څه موده کېږي چې ښار کې چاودنې زیاتې شوې دي. موږ چې کله ښار کې ګرځو نو سخت ‌‌‌‌‌‌ډارېږو او حکومت یې باید غم وخوري چې حالات ښه شي."

د ښار یو بل اوسېدونکی فقیر محمد هم وايي، چې ښار کې ګڼه ګوڼه هم کمه شوې ده، حکومت باید امنیت راولي.

د تېرې شنبې په ورځ د ننګرهار سیمه ییزو چارواکو ویلي و چې په دې وروستیو کې د دغه ولایت د خوګیاڼو ولسوالۍ په وزیرو او نورو سیمو کې د داعش او نورو مخالفینو په مرکزونو ځمکني او هوایي بریدونه زیات شوي، چې له امله دوی غواړي، په مرکز کې د ځینو پېښو په تر سره کولو سره تبلیغاتو ته زمینه برابره کړي.​

تر دا مهاله د دغه چاودنې مسؤلیت کومې وسله والې ډلې په غاړه نه دی اخیستی.

دا په روانه اونۍ کې د دریمې ورځې لپاره دریمه چاودنه ده چې په جلال اباد ښار کې رامنځته کېږي.

د تېرې شنبې په ورځ په جلال اباد ښار کې دوو پرلپسې چاودنو د مېرمنو په ګډون ۳ تنه ووژل او ۱۹ تنه یې ټپیان کړل، پرون یکشنبه هم په جلال ښار کې چاودنې درې تنه ټپیان کړي و.

د دغه چاودنو د قربانیانو زیاته برخه ملکي وګړي دي.

XS
SM
MD
LG