په هرات ولایت کې ناپېژنده وسلهوالو د یوې کورنۍ درې غړي په ډزو وژلي او ۱۱ نور یې ټپیان کړي دي.
د هرات د پولیسو ویاند عبدالاحد وليزاده وايي چې دا پېښه تېره شپه د دغه ولایت په انجیل ولسوالۍ کې شوې ده.
وليزاده زیاتوي چې د دغې کورنۍ غړي د تفریح لپاره له ښار څخه انجیل ولسوالۍ ته تللي وو چې ورباندې ناپیژنده وسلهوالو ډزې کړې دي.
د هغه په وینا په دغه برید کې د یوې کورنۍ درې غړي چې دوه ښځې او یو ماشوم په کې شامل دی وژل شوي او د همدې کورنۍ ۱۱ نور غړي ټپیان شوي دي.
د هرات د پولیسو ویاند وايي چې په ټپیانو کې هم ښځې او ماشومان شامل دي.
د هرات د حوزوي روغتون رئیس ډاکټر عارف جیلاني هم تائید کړې چې د پېښې له ځای څخه درې جسدونه او ۱۱ ټپيان روغتون ته انتقال شوي دي.
دی وايي چې د یو ټپي روغتیايي وضعیت د اندېښنې وړ دی.
تراوسه د دغه وسلهوال برید لامل څرګند شوی نه دی، خو د هرات سیمهییز امنیتي چارواکي وايي چې پولیسو په دې اړه پلټنې پیل کړې دي.
