د لاس رسي وړ اتصالات

روغتیا وزارت: په افغانستان د کرونا درېیمه څپه راغلې خو تدابیر هم نیول شوي


د افغانستان د روغتیا وزارت په دغه هېواد کې د کروناویروس په مثبتو پېښو کې زیاتوالي ته په اشارې وايي چې په روغتونو کې د اکسیجن کموالی په یوې لویې ستونزې بدل شوی دی.

د دغه وزارت سرپرست ډاکټر وحید مجروح وویل چې یوه میاشت وړاندې خلکو ته په جدي توګه د روغتیايي سپارښتنو د رعایتولو خبرداری ورکړل شوی و خو هیچا ورته پاملرنه ونکړه او اوس د خلکو د بې‌پروايئ زیان روغتیايي کارکوونکي ګالي.

هغه زیاته کړه: "ما درې ورځې وړاندې وویل چې کرار کرار خو نن وایم چې په چټکۍ سره په افغانستان کې د کړکېچ پړاو ته دننه کېږو، یو له هغو اړخونو څخه چې دا کړکېچ یې پراخ کړی دی، په افغانستان کې د اکسیجن کموالی دی".

ښاغلي مجروح وویل چې په ټول افغانستان کې او په ځانګړې توګه په کابل ښار کې په کروناویروس د اخته شویو کسانو په شمېر کې زیاتوالي اکسیجن ته اړتیا ډېره کړې ده.

ډاکټر مجروح وویل: "په کابل کې موږ د اکسیجن د تولید اوه فابریکې لرو، خو په خواشینۍ سره په مارکیټ کې د غوښتنې کچې د لوړېدو له امله (دا فابریکې) چې کوم تړون د روغتیا له سکتور سره لري ورباندې عمل نشي کولی".

د افغانستان د روغتیا وزارت د معلوماتو په اساس په تېره یوه شپه او ورځ کې د افغانستان په ۳۴ ولایتونو کې د کروناویروس ۱۵۰۹ مثبتې پېښې ثبت شوي دي.

د تازه مثبتو پېښو په ثبت سره په افغانستان کې د کروناویروس د ټولو مثبتو پېښو شمېر ۷۶زره او ۶۵۳ ته پورته شوی او درې زره او ۸۶ کسان له دغې ناروغۍ مړه شوي دي.

د کروناویروس د لومړي ځل لپاره د چین د هوبي ایالت په ووهان ښار کې پیدا او په چټکۍ سره ټولې نړۍ ته ورسېد.

د امریکا د جانس هاپکینز پوهنتون د معلوماتو په اساس تراوسه په نړۍ کې څه باندې ۱۷۱میلیونه او ۷۳۷ کسان په کروناویروس اخته شوي چې له دې شمېرې کابو درې میلیونه او ۶۹۳ کسان مړه شوي دي.

XS
SM
MD
LG