په افغانستان کې د ملګرو ملتونو د سرمنشي استازې وایي چې اوسمهال به د افغانانو یوازې پرېښودل یوه تاریخي تیروتنه وي، هغه تیروتنه چې پخوا هم شوې او ناوړه پایلې یې درلودلي دي.
ډیبرا لاینز د چهار شنبې په ورځ نومبر ۱۷ (لړم ۲۶) په نیویارک کې د ملګرو ملتونو د امنیت شورا په غونډه کې وویل:"د طالبانو په واکمنیدو سره، د افغانستان خلک اوس احساس کوي چې هیر شوي ، یوازې پریښودل شوي او په داسې شرایطو کې چې د هغوی تقصیر ندی، مجازات شوي دي."
میرمن لاینز د ملګرو متلونو امنیت شورا ته ډاډ ورکړ چې هغوی د اقلیتونو د حقونو، د میرمنو د حقونو، د نجونو د زده کړو، ځورونو، همه شموله حکومت او غیر قانوني وژنو په شان د نړیوالې ټولنې اندیښنې له طالبانو سره شریکې کړي او په اکثریت موارد کې طالبانو ویلي دي چې تیروتنې شوي او هڅه کیږي چې رسیدګي ورته وشي.
د ملګرو ملتونو د سرمنشي ځانګړې استازي د نجونو د تحصیل په اړه زیاته کړه چې طالبانو ټینګار کړی اوسمهال په داسې طرزالعمل کار کوي چې په ټول افغانستان کې د زده کړو یو سراسري امن چاپیریال رامنځ ته کړي خو ددې پالیسي د جوړیدو او پلي کیدو لپاره ډیر وخت ته اړتیا ده.
طالبانو د سپتمبر په ۱۷ نیټه د هلکانو ښوونځي پرانیستل خو نجونو ته یې له ځینو ولایتونو پرته په اکثریت ځایونو کې له شپږم ټولګي پورته د زده کړو اجازه نده ورکړي چې دې کار د نړیوالو غبرګونونه راپارولي دي.
میرمن لاینز وویل سره له دې چې طالب مشرانو په لومړیو کې د اسلامي قوانینو په چوکاټ کې د میرمنو د حقونو د ملاتړ په اړه ډاډ ورکړی و خو په مجموع کې د میرمنو او نجونو اساسي حقونه محدود شوي دي او دا محدودیتونه په هر ولایت کې تفاوت لري.
د افغانستان په یو شمیر شمالي ولایتونو لکه کندز او مزار شریف ښار کې نجونو ته له لومړي تر دولسم ټولګي د زده کړو اجازه ورکړل شوې ده خو د افغانستان په نورو ولایتونو کې د نجونو د ښوونځیو تړلي پاتې کیدو نړیوال شکونه راپارولي او هغوی له طالبانو غواړي چې په خپلو ژمنو عمل وکړي.
میرمن لاینز د مختلفو دلایلو له مخې پر مظاهرو، بیان ازادي، له خپلو سیمو څخه د اقلیتونو د اجباري وتلو او د رسنیو د بندیدو په شان محدودیتونو او همدارنګه د طالبانو له خوا د رسنیو په خپرونو د محدودیتونو د لګولو په اړه اندیښنه ښودلې ده.
هغې د اسلامي دولت د ډلې د خراسان څانګې د پراخیدو په مخنیوي کې د طالبانو د ناتواني او د یادې ډلې بریدونو د زیاتیدو په اړه اندیښنه ښودلې ده. میرمن لاینز ویلي یو وخت د داعش د خراسان څانګې بریدونه یوازې کابل او څو ولایتونو ته محدود وو خو اوس داسې ښکاري چې تقریبا ټولو ولایتونو کې فعالیت لري.