په جرمني چارواکي وايي د فرانګفورټ په یوې کلیسا کې د مذهبي مراسمو له ترسره کولو وروسته څه باندې۴۰ کسان د کرونا په ویروس اخته شوي دي.
د فرانګفورټ د ښار د روغتیا د څانګې مرستیال ریني ګوتسچاګ د جرمني ډي پي اې اژانس ته وویل: "اخته شوي کسان ډېر جدي نارروغ نه دي. په دوی کې یې یوازې یو کس په روغتون کې بستر شوی دی."
د جرمني د هیسن په ایالت کې، چې تجارتي مرکز فرانګفورټ هم په کې دی، حکومت د مۍ له لومړۍ نېټې را وروسته کلیساو ته اجازه ورکړې ده چې مذهبي مراسم ترسره کړي.
دا پېښه د مۍ په لسمه شوې ده خو چارواکو د شنبې په ورځ مۍ۲۲ (غبرګولي۳) رسنیو ته دا خبر ورکړی دی.
چارواکي وايي چې په کلیسا کې دغو عبادت کوونکو د حکومت د لارښوونو سره سم د یو بل ترمنځ واټن ساتلی و، خو بیا هم په دغه ویروس ککړ شوي دي.
جرمني په اروپا کې د برتانیا، ایټالیا، فرانسه او هسپانیا په پرتله د کروناویروس له کبله کم تلفات لري.
د امریکا د جانس هاپکینز پوهنتون د معلوماتو په اساس د یکشنبې تر سهار مۍ۲۴ (غبرګولي۴) په جرمني کې د کروناویروس له کبله ۸۲۷۴ کسان مړه شوي دي او نژدې ۱۸۰زره نور په دغه ویروس اخته دي.
د کروناویروس په لومړي ځل د ۲۰۱۹ د ډسمبر په میاشت کې د چین د هوبي په ښار کې خپور شو چې دا مهال د نړۍ۱۸۷ هېوادونو او سیمو ته رسېدلی دی.
د کروناویرس له کبله تر دې دمه په نړۍ کې شاوخوا ۳۴۲زره انسانان مړه شوي دي او څه باندې ۵.۳۲ میلیون نور په دغه ویروس اخته دي.