د لاس رسي وړ اتصالات

ملګري ملتونه: د ترهګرۍ په پېښو کې د زیانمنو شویو ملا وتړئ


د ملګرو ملتونو سرمنشي د ترهګرۍ د قربانیانو په ملاتړ ټینګار وکړ

ملګري ملتونه هغو کسانو د زیات ملاتړ غوښتنه کوي چې د ترهګرۍ په پيښو کې ېې مالي او ځاني زیانونه ګاللي دي.

د ترهګرۍ د قربانیانو د درناوي د نړېوالې ورځې په مناسبت د ملګرو ملتونو عمومي منشي انتونیو ګوتیریش ویلي چې د زیانمنو لپاره باید عدالت تامین شي.

ښاغلي ګوتیریش د ترهګرۍ د قربانیانو د عکسونو د یوه نندارتون د پرانيستلو په مراسمو کې ترهګري او افراطیت جدي خطر وباله.

نوموړي زیاته کړه چې په تیرو میاشتو کې خلک په کابل، قاهره، ناجیریا، بورکینا فاسو او ځینو نورو سیمو کې د ډارونکو بریدونو شاهدان وو.

هغه د کابل د تیرې شنبې ورځې د برید د قربانیانو له کورنیو سره خواخوږي وښوده ویې ویل چې دغه شان حملې کورنیو، ټولنو او په مجموع کې ملتونو ته دوامداره زیان رسوي.

انتونیو ګوتيریش وویل:" موږ باید د حل لارو په موندلو کې په مساوي ډول ثابت ووسو او په خپلو ټولو هڅو کې د قربانیانو او ژونديو پاتې شویو کسانو غږ واورو."

په ملګرو ملتونو کې د افغانستان دایمي استازې عادله راز وایې چې هیواد یې له ترهګرۍ سره د مبارزې په لومړۍ کرښه کې جنګيږي.

په پام کې ده چې په راتلونکي کال کې ملګري ملتونه د ترهګرۍ د قربانیانو کانګرس جوړ کړي او دا به د نړۍ له هرې برخې نه د خلکو د غږ او غوښتنو د اورېدو لپاره یو ښه فرصت برابر کړي.

دا دویم کال دی چې د ترهګرۍ د قربانیانو د یادولو او درناوي ورځ لمانځل کيږي.

سږکال ټول تمرکز د قربانیانو او د هغوي د کورنیو پر مقاومت راڅرخيده.

XS
SM
MD
LG