د هند کرکت بورډ د جمعې په ورځ (مارچ۱۳) اعلان وکړ چې د کروناویروس د خپرېدو د مخنیوي لپاره یې د آی پي ال لیګ لوبې دوې اونۍ وځنډولې.
ټاکل شوې وه چې دا لیګ به د مارچ په ۲۹ پیل شي، خو اوس د اپریل تر ۱۵ ځنډول شوی دی. د اټکل له مخې هند هرکال د دغه لیګ له لارې ۱۱ میلیارد ډالر عاید ترلاسه کوي.
آی پي ال د کرکټ د نړۍ تر ټولو ستر تجارتي لیګ دی چې د لسګونو نورو بهرنیو لوبغاړو تر څنګ درې افغان لوبغاړي، راشد خان، محمد نبي او مجیب الرحمن هم په کې لوبیږي.
د هند په ورڅېرمه هېواد پاکستان کې بیا د هغه هېواد تجارتي لیګ ( پي اس اِل) لوبې روانې دي خو ځینو نړیوالو لوبغاړو د کرونا ویروس له کبله وار له مخه له دغه لیګ سره خدای په اماني کړې او خپلو هېوادونو ته ستانه شوي دي.
د پاکستان کرکټ بورډ د لیګ لوبغاړو ته دا اختیار ورکړی دی که خپلو هېوادونو ته ځي، تللی شي. بورډ وايي د کرونا ویروس د خپرېدو له ویرې سربیره به د پي اس ال پاتې لوبې کیږي او د لوبغالو دروازې به تړلې وي چې نندارچیان رانشي.
په همدې حال کې د انګلنډ د کرکټ ملي لوبډلې سریلانکا سره خپل پلان شوې لوبې لغوه کړې او خپل لوبغاړي یې بېرته انګلنډ ته بللي دي. د انګلنډ کرکټ بورډ ویلي دي چې د لوبغاړو صحت او ذهني سکون یې مهم دی او له سریلانکا سره به د لوبو په اړه بیا پرېکړه کوي.
پر کرکټ سربېره د اروپا د فوټبال یو شمېر ستر تجارتي لیګونه هم ځنډول شوي دي. د انګلنډ پریمیرلیګ هم ځنډول شوی. دا لیګ به د اپریل تر څلورمې ځنډېدلی وي.
د انګلنډ په پریمیرلیګ کې ارسنال لوبډلې روزونکی مایکل ارتیتا په کرونا ویروس اخته شوی دی.
ایټالیا چې کروناویروس په کې څه باندې ۱۰۰۰ کسان مړه کړي هم د فوټبال لیګونه ځنډولي دي.
کروناویروس دا مهال په ۱۲۱ هېوادونو کې خپور دی او څه باندې ۵۰۰۰ کسان یې مړه کړي دي.