د امریکا د متحدو ایالتونو د استازو د خونې ځینو وکیلانو هلې ځلې پیل کړي دي چې په واشنګټن کې د چین سفارت مخې ته سړک د هغه چینايي ډاکټر په نوم کړي چې د کروناویرس له کبله مړ شو.
د استازو په خونه کې د جمهوري غوښتونکو ګوند استازې لیز چینې دا لایحه وړاندې کړې ده.
هغې وویل: "ښايي دا کار نړۍ او د چین حکومت ته یو تلپاتې یادښت وي چې حقیقت او آزادي ګټونکي دي، موږ به د ډاکټر لي زړورتیا نه هېرو او د چین کمونست ګوند سره به د درواغو له کبله حساب او کتاب وشي."
د پنجشنبې په ورځ مۍ۷ د امریکا د متحدو ایالتونو په سنا کې هم همداسې یوه لایحه مخې ته شوه. سناتور بن ساسي وویل: "ډاکټر لي د چینایانو لپاره یو اتل"دی.
ښاغلي ساسي زیاته کړه چې د لې په نوم د دغه سړک نومول به "د چین د کمونست ګوند د جبر او درواغو او د چین د خلکو د مدنیت ترمنځ یو توپیر وي."
څلور دېرش کلن ډاکټر "لي وینلیانګ" په اول ځل د (WeChat) له لارې خپلو همکارانو ته د کروناویروس په اړه خبرداری ورکړی و. خو څو ورځې وروسته پولیسو هغه وګواښه چې دا خبره پټه پاتې شي او اړ یې کړ چې اعتراف وکړي د کرونا ویروس په اړه یې معلومات غلط وو.
ډاکټر وینلیانګ د جنوري په درېیمه د همدغه ویروس له کبله مړ شو. په ټولنیزو رسنیو کې ځینو کسانو هغه یو اتل بللی دی او د چین له حکومت یې غوښتي چې له هغه بخښنه وغواړي.
په همدې حال کې د ټولنیزو رسنیو ځینو کاروونکو په بیجنګ تور لګولی چې نه یې غوښتل د کرونا ویروس په اړه خلک او نړۍ خبره شي.
دا لومړی ځل نه دی چې په واشنګټن ډي سي کې د چین د سفارت مخې ته د سړک د نوم د بدلولو هڅه کیږي. په ۲۰۱۷ کې د چین د یو لیکوال لیو ژيابو په نوم هم د دغه سړک د نومولو وړاندیز شوی وی. هغه په روغتون کې تر نظارت لاندې مړ شوی و.
د کرونا ویروس په لومړي ځل د ۲۰۱۹ د ډسمبر په میاشت کې د چین د ووهان په ښار کې خپور شو چې دا مهال د نړۍ په ۱۸۷ هېوادونو او سیمو کې پرې څه باندې ۳.۹۵ کسان اخته دي او شاوخوا ۲۷۵زره نور یې له کبله مړه شوي دي.