د امریکا د متحدو ایالتونو د استازو د خونې د بهرنیو اړیکو د کمېټې مشر مایکل مککال ویلي دي چې د بهرنیو چارو وزارت له افغانستان څخه د امریکايي ځواکونو د وتلو په اړه د تحقیقاتو دپاره د معلوماتو په ورکولو کې پاتې راغلی دی او په خبره یې، د امریکا خلک "ګمراه " کوي.
مککال نن چهارشنبه مارچ ۱۵ (کب۲۴) په یوې اعلامیې کې ویلي دي: «د بهرنیو چارو وزارت له افغانستان څخه د تلو په اړه د تحقیقاتو په مخکې خنډ جوړول روان ساتلي او موږ دا نشو زغملای. د امریکا خلک له افغانستان څخه د ناورین زېږونکي خروج په اړه د ځوابونو د ترلاسه کولو مستحق دي.»
د استازو د خونې د بهرنیو اړیکو کمېټې تېره چهارشنبه له افغانستان څخه د امریکايي ځواکونو د وتلو په اړه یوه استعماعیه غونډه وکړه او د امریکا ځینو اوسنیو او پخوانیو پوځيانو په کې په دې اړه ګواهي ورکړه.
د جمهوريت غوښتونکو له لوري د استازو په خونې کې د اکثریت له ګټلو وروسته، دا له افغانستان څخه د ځواکونو د وتلو په اړه د بهرنیو اړیکو د کمېټې لومړۍ غونډه وه.
د دغې استماعیه غونډې څخه دوې ورځې وروسته د بهرنیو چارو وزارت ویاند ند پرایس خبري کنفرانس ته وویل چې وزارت د کانګرس په تحقیقاتو کې د ضروري معلوماتو په برابرولو کې همکار او ژمن دی. هغه وویل: «د امریکا د بهرنیو چارو وزارت له کانګرس سره رغوونکي او باثمره روابط لري.»
د مککال په اعلامیې کې راغلي دي چې د بهرنیو چارو وزارت باید د افغانستان لپاره د امریکا د دپلوماتیک ماموریت کاري راپور، په کابل کې د سفارت اضطراري کاري پلانونو او د ځواب ورکوونې او ارتباط د کانالونو په اړه معلومات ژر تر ژره د بهرنیو اړیکو کمېټې ته وسپاري.
مککال ویلي دي: «له [افغانستان څخه] وتل د [بایډن] په حکومت باندې د شرم یو داغ دی او د شفافیت نشتوالي د پټولو په اړه د وزارت هڅه یوه بله انګیزه ده چې باید یې په اړه ځواب وویل شي.»
په دې اعلامیې کې راغلي دي چې د روان کال د جنورۍ په ۱۲، ۲۶، ۳۰ او د فبرورۍ په ۱۴، درېیمې، د مارچ په اتمې او د مارچ په ۱۲ نېټو د کانګرس ګمارل شوې کمېټې د بهرنیو چارو له وزارت څخه د معلوماتو او غوښتنه کړې ده خو همکاري نه ده شوې.
د امریکا د استازو جرګې نوی مشر وايي د بایډن د حکومت د تګلارو په اړه تحقیقات کوي
په همدې حال کې د بهرنیو چارو وزارت ویاند ند پرایس وویل: «له افغانستان څخه د امریکايي ځواکونو له وتلو وروسته موږ په کانګرس کې د دواړو ګوندونو [جمهوریت غوښتونکو او دموکرات] غړو ته څه باندې ۱۵۰ ځلې راپورونه ورکړي دي. په دې سربېره، د وزارت لوړ پوړیو مقاماتو په عمومي استماعیه غونډو کې ګډون کړی او پوښتنو ته یې ځوابونه ورکړي دي او دغه وزارت د کانګرس بېلا بېلو غړو او کارکوونکو ته د افغانستان د تګلارې په اړه ځوابونه ورکړي دي.»
نوموړي ویلي دي چې مککال د روان کال په لومړيو کې د بهرنیو چارو وزارت ته تللی او له وزیر سره یې «رغوونکی بحث درلوده». هغه وویل: «له هماغه وخت راهېسې، د بهرنیو چارو وزیر له مککال سره ژمنه وکړه چې د دغې کمېټې په کار کې به همکاري کوي او له هغه وخت راهېسې د مککال د پوښتنو په ځواب کې سلګونه سندونه وړاندې کړل شوي دي.»
سره له دې چې جمهوریت غوښتونکي له افغانستان څخه د امریکايي ځواکونو د وتلو په اړه د جوبایډن په تګلارې نیوکه کوي، خو هغه د خپلې پرېکړې ننګه کړې ده او ویلي دي چې دا پرېکړه یې د امریکا د پوځي مقاماتو او دپلوماتانو سره له مشورې وروسته او د امریکا د ملي ګټو په اساس کړې ده. ولسمشر بایډن همدغه راز ویلي دي چې له افغانستان څخه د تخلیې پروګرام په تاریخ کې ساری نلري.
افغانستان د ۲۰۲۱ د اګست په میاشت کې له افغانستان څخه خپل ټول ځواکونه واېستل او وروستی عسکر یې په ۳۰ نېټه له هغه هېواد څخه ووت.