د سپینې ماڼۍ او د امریکا پوځي چارواکي وايي د امریکا او ناټو ځواکونو د شنبې په ورځ مۍ لومړۍ (غوايي۱۱) په رسمي ډول له افغانستان څه وتل پیل کړل.
دا مهال په افغانستان کې د ۲۵۰۰ او ۳۵۰۰ ترمنځ امریکايي سرتېري او شاوخوا ۷۰۰۰ د ناټو عسکر دېره دي.
د امریکا ولسمشر جوبایډن ویلي چې د وتلو بهیر به د ۲۰۲۱ د سپتمبر په میاشت کې بشپړیږي.
په افغانستان کې د مېشتو بهرنیو ځواکونو عمومي قومندان سکاټ میلر طالبانو ته خبردار ورکړ که د ځواکونو د وتلو پر مهال یې برید وکړ، په ټول قوت سره ځواب به ورکړي.
د امریکا په مشرۍ د ناټو ځواکونه د ۲۰۰۱ د اکتوبر په میاشت کې پر امریکا د القاعده ډلې د الوتکو له ترهګریزو بریدونو وروسته افغانستان ته ولاړل چې د ترهګرۍ په ضد جګړه وکړي.
امریکايی ځواکونو په ۲۰۱۱ کې د القاعده ډلې مشر د پاکستان په ایبټ اباد کې وواژه.
د براون پوهنتون د جګړې د زیانونو د پروژې په اساس په تېرو ۲۰کلنو جګړو کې ۴۷۲۴۰ ولسي افغانان او د ۶۶۰۰۰ او ۶۹۰۰۰ ترمنځ افغان امنیتي او دفاعي ځواکونه وژل شوي.
د امریکا د دفاع وزارت وايي په دغه جګړې کې ۲۴۴۲ امریکايي سرتېري او ۳۸۰۰ خصوصي امنیتي قراردادیان وژل شوي دي.
پر دې سربېره د ناټو دغړو هېوادونو ۱۱۴۰ عسکر هم په دغې شل کلنې جګړې کې وژل شوي دي.
د جګړې د زیانونو پروژه وايي د اټکل له مخې د امریکا متحدو ایالتونو په افغانستان کې په دغې موده کې څه باندې دوه تریلیون ډالر لګولي دي.
