وروسته له هغې چې تهران د امریکا او اسرائیل له لوري پر ایران د بریدونو په ترڅ کې کوربه هېوادونه د توغندیو په پرلهپسې بریدونو په نښه کړل، په منځني ختیځ کې د امریکا سفارتونو د خپلو کارکوونکو په ګډون له امریکايي اتباعو، غوښتي چې ځانونه خوندي کړي او خپل تګ راتګ محدود کړي.
متحده عربي اماراتو او قطر هر یوه راپور ورکړی چې د ایران له لوري د توغندیو د بریدونو لږ تر لږه دوه څپې یې شنډې کړې دي. ابوظبۍ مخکې راپور ورکړی و چې د را لوېدلو ټوټو له امله لږ تر لږه یو کس، چې یو اسیایي تبعه و، وژل شوی دی.
د متحده ایالتونو د بهرنیو چارو وزارت په "ټول ایران کې" له امریکایي وګړو څخه د یوې خبرتیا په خپرولو سره غوښتنه وکړه چې د پوځي عملیاتو د دوام له امله تر "بلې خبرتیا پورې" په هغه ځای کې چې دي هماغلته دې ځانونه خوندي وساتي. په دې پیغام کې لاندې سپارښتنې هم د "ضروري اقداماتو" په توګه وړاندې شوي دي:
خپلې استوګنې یا بله خوندي سیمه کې یو مصون ځای پیدا کړئ. یو څه خواړه، اوبه، درمل، او نور اړین توکي له ځانه سره ولرئ.
د مظاهرو څخه ډډه وکړئ، کوښښ وکړئ چې تاسو ته توجه جلبه نشي، او د خپل شاوخوا چاپیریال په اړه با خبره اوسئ.
د منځني ختيځ هېوادونو وروسته له دې چې متحدو ایالتونو او اسرائيل د تهران پر وړاندې پراخ عمليات پيل کړل، د ايران لخوا بریدګر عمليات وغندل.
د امريکا د ولسمشر ډونالډ ټرمپ لخوا د شنبې په سهار د ايران پر وړاندې د پوځي عملياتو تر اعلان وروسته د منځني ختيځ په بېلابېلو سيمو کې چاودنې شوي دي. امريکا په قطر، کویټ او بحرين کې پوځي اډې لري، او دا درې هېوادونه راپور ورکوي چې د ايران له لوري بريدونه شنډ کړي دي.
د امریکا متحده ایالتونه او اسرائیل وایي چې د شنبې په ورځ یې پر ایران "لوی پوځي" برید پيل کړ.
د متحدو ایالتونو ولسمشر، ډونالډ ټرمپ د ایران د رژیم په وړاندې د لویو جنګي عملیاتو تایید وکړ او په داسې حال کې چې بریدونه روان وو له ایرانیانو یې وغوښتل چې "خپل حکومت په خپل واک کې واخلي".
هغه وویل: "لږ څه مخکې، پوځ په ایران کې پراخ جنګي عملیات پیل کړل. زموږ موخه دا ده چې د ایران د رژیم له لوري رامنځته کېدونکي عاجل ګواښونه له منځه یوسو، څو د امریکا خلک خوندي کړو. دا د یو ظالم او ډېر سخت رژیم خلک دي. د دوی ګواښوونکې اعمال په مستقیم ډول متحده ایالتونه، زموږ سرتېري، زموږ بهرنۍ اډې، او زموږ متحدین په ټوله نړۍ کې له خطر سره مخ کوي.
