د لاس رسي وړ اتصالات

اسرائیل د ملګرو ملتونو په یوې ادارې د امریکا د مرستو بندلولو هرکلی وکړ


د اسرائیل حکومت نن د شنبې په ورځ (سپتمبر ١) د امریکا د حکومت پریکړه وستایله او د فلسطیني مهاجرو سره د مرستې کولو دغه سازمان یې پدې تورن کړی چې غواړي د منځني ختیځ کړکیچ دایمي کړي.

خو د فلسطیني مهاجرو په چارو کې د ملګرو ملتونو ادارې د امریکا د حکومت هغه فیصله غندلې چې دغې ادارې ته یې د مالي مرستو ورکول بند کړي دي.

ددغې خیریه ادارې یو ویاند کریس ګنیس ویلي چې د واشنګټن تازه اقدام میلیونه کډوال له ستونزو سره مخامخ کوي.

ښاغلي ګنیس ویلي چې ښايي د مرستو د بندېدو فیصله د سیاسي ملحوظاتو له مخې شوې وي.

د امریکا حکومت د فلسطیني مهاجرو په چارو کې د ملګرو ملتونو د ادارې دیرش فیصده بودیجه ورکوله.

بلخوا د امریکا له خوا فلسطین ته د مرستو د بندیدو وروسته د جرمني حکومت ویلي چې د فلسطینیانو سره به خپلې مرستې زیاتې کړي.

د جرمني د بهرنیو چارو وزیر هایکو ماس د جمعې په ورځ وویل چې د فلسطیني مهاجرو په چارو کې د ملگرو ملتونو د مرستندویه سازمان سره د مرستو بندیدل به د فلسطینیانو ترمنځ بې باوري رامنځ ته کړي.

ښاغلي ماس ویلي چې د ملگرو ملتونو ددغې ادارې له منځه تلل کیدای شي د نه کنترولیدونکو غبرگونونو د رامنځ ته کیدو سبب شي.

جرمني د ٢٠١٨ کال له پیل راهیسې د ملگرو ملتونو دغې ادارې سره شاوخوا ٩۴ میلون ډالر مرسته کړې ده او ددې هیواد د بهرنیو چارو وزیر ویلي چې هیواد به یې له دې ادارې سره په خپلو مرستو کې د پام وړ زیاتوالی راوړي.

اسرائیل او د امریکا متحده ایالات دواړه د (UNRWA) په نامه د ملگرو ملتونو د فلسطیني مهاجرو ٧٠ کلنه اداره په دې تورنوي چې دا اداره اکثر فلسطینیان مهاجر گڼي او وایي دوی ددې حق لري چې هغو سیمو ته چې د ١٩۴٨ کال د جگړې په ترڅ کې ترې تښتیدلي او یا ایستل شوي بیرته لاړ شي او د دوی په وینا دا مفکوره د اسرائیل د موجودیت پر ضد ده.

د فلسطیني مهاجرو لپاره د ملگرو ملتونو اداره ددې سازمان د ١٩۴٩ کال د عمومي غونډې د پریکړه لیک پر اساس جوړه شوې ده. اوسمهال دا اداره په فلسطیني قلمرو او په لبنان او اردن کې د مهاجرو په کمپونو کې ٥٢٦٠٠٠ فلسطیني ماشومانو ته د زده کړو زمینه برابره کړې ده.

د ملگرو ملتونو عمومي منشي انتونیو گیتریس ویلي چې پدې ادارې "پوره باور" لري او له نورو هیوادونو نه یې غوښتي چې له دې ادارې سره مرسته وکړي.

XS
SM
MD
LG