د خوست روغتیایي چارواکي وایي چې په دې ولایت کې د هغو کورنیو شمېر مخ په کمیدو دی چې پخوا یې خپلو ماشومانو ته د واکسین له ورکولو ډډه کوله.
د روغتیایي چارواکو د معلوماتو پر بنسټ، اوس مهال په خوست ولایت کې شاوخوا ۶۰۰۰ کورنۍ شته چې د بیلابیلو لاملونو له امله خپل ماشومان نه واکسینوي.
په خوست کې د طالبانو د حکومت د عامې روغتیا رئيس، ډاکټر فضلکریم مندوزي امریکا غږ ته وویل: ”د روان میلادي کال په جون میاشت کې له واکسین څخه د ډډه کوونکو کورنیو شمېر ۱۲۰۰۰ ؤ، خو له نیکه مرغه د سپټمبر په میاشت کې دغه شمېر ۶۰۰۰ ته راټیټ شوی او لاهم مخ په تیټیدو دی.“
ښاغلي مندوزي زیاته کړه: ”د پخوا په پرتله د خوست ولایت د کمپاینونو په پوښښ کې هم مثبت بدلون راغلی. د ۲۰۲۲ کال په جولای میاشت کې ۳۳۶۷۳۸ ماشومان او په سپټمبر میاشت کې ۳۴۳۵۴۰ ماشومان واکسین شوي، حال دا چې تېر کال همدا وخت د واکسین شویو ماشومانو شمېر یواځې ۲۶۲۵۱۶ ماشومانو ته رسیده.“
بل لوري ته د خوست ځیني اوسیدونکي وایي چې پخوا یو شمېر کورنیو د پولیو ضد واکسین د ګټو په اړه د معلوماتو د نه لرلو له امله خپل ماشومان نه واکسینول، خو اوس ټولې کورنۍ خپل ماشومان واکسینوي.
د خوست ښار اوسیدونکي، عابد شناس امریکا غږ ته وویل: ”خوست کې زموږ د کورنۍ په ګډون، ګڼ شمېر داسې کورنۍ وې چې پخوا یې له واکسین سره مخالفت کاوه، خو اوس مو چې د روغتیا پالانو، نورو کورنیو او دوستانو په مرسته د پولیو ضد واکسین د ګټو په اړه معلومات ترلاسه کړي، غواړو چې خپل ماشومان په ټاکلي وخت واکسین کړو.“
د روغتیا پالانو په وینا، لا هم د افغانستان په کلیو او لیرو پرتو سیمو کې د ګوزڼ ضد واکسین په اړه ناسم روایتونه شته، چې په یو شمېر کورنیو یې اغیز کړی او نه غواړي چې خپل ماشومان واکسین کړي.