روسیې او د افغانستان شپږو ګاونډیو هیوادونو د سه شنبې په ورځ مارچ اومه (کب ۱۶) یوه ټولنه رامنځ ته کړه چې په جګړه ځپلې افغانستان کې د دوامداره سولې د راوستو په لارو چارو بحث وکړي.
یادو هیوادونو د خپلې ټولنې په پرانیست غونډه کې د افغانستان بانک د کنګل شویو شتمنیو د آزادیدو غوښتنه وکړه، هغه پيسې چې واک ته د طالبانو په بیا رسیدو سره د متحدو ایالتونو له خوا کنګل شوي دي.
د اوزبیکستان د بهرنیو چارو وزارت ویلي دي د روسیې، چین، ایران، پاکستان، اوزبیکستان، تاجیکستان او ترکمنستان ځانګړو استازو په پلازمینه تاشکند کې سره ولیدل. دغه هیوادونه غواړي چې په عادي شکل د افغانستان په اړوندو مسایلو بحث وکړي.
د اوزبیکستان ځانګړي استازي عصمت الله ارګاشف وویل یادې ډلې له غربي هیوادونو غوښتي دي چې د افغانستان پر کنګل شویو شتمنیو محدودیتونه لغوه کړي.
ارګاشف وویل، د یادو هیوادونو استازو ټینګار وکړ: "د افغانستان بانک د پیسو په ستنیدو سره په لومړي ګام کې د ښوونځیو، ډاکټرانو ... تنخواوي ورکړل شي او په عین حال کې له هغو وګړو څخه چې په سخت وخت کې دي، ملاتړ وشي."
د ارګاشف په وینا، د یادو هیوادونو استازو ټینګار وکړ چې د افغانستان کابو ۲۵ میلیون نفوس په لوږه او غذایي محرومیت کې ژوند کوي.
د ۲۰۲۱ کال په اګست میاشت کې له افغانستان څخه د امریکا او ناټو ځواکونو تر وتلو وروسته او پر هغه هیواد د طالبانو تر بیا واکمنیدو وروسته، متحدو ایالتونو او نورو غربي هیوادونو د افغانستان ۹.۵ میلیارده ډالره کنګل کړل او د طالبانو لاسرسی یې ورته بند کړ.
له دې مبلغ څخه کابو اوه میلیارده ډالره د نیویارک په فدرال بانک کې کنګل شول.
ولسمشر جو بایډن د ۲۰۲۲ کال د فبروري میاشتې په وروستیو کې یو اجرایوي فرمان لاسلیک کړ چې د افغانستان بانک اوه میلیارده ډالره کنګل شوي پيسې یې په دوو برخو وویشتلې. یوه برخه یې د افغان بشردوستانه وجهي صندوق ته ځانګړي کړې او پاتې نیمایي یې د ۲۰۰۱ کال د سپټمبر د ۱۱ د بریدونو د قربانیانو د کورنیو د ادعاوو تر هواریدو پورې په متحدو ایالتونو کې وساتلې.
خو یو امریکایي قاضي د ۲۰۲۳ کال د فبروري ۲۱ (کب دویمه) پریکړه وکړه چې د ۲۰۰۱ کال د سپټمبر د ۱۱ د پيښې د قربانیانو کورنۍ د افغانستان بانک د ۳.۵ میلیارده ډالرو د ترلاسه کیدو مستحقې ندي، هغه پریکړه چې طالبانو یې هرکلی وکړ.
ملګرو ملتونو د روان میلادي کال د فبروري په میاشت کې وویل چې په افغانستان کې شپږ میلیونه انسانان د قحطۍ له خطر سره مخ دي او له دریو څخه دوه برخې وګړي له شدید لوږي سره مخ دي چې بیړنیو مرستو ته اړتیا لري.
