که څه هم د افغانستان حکومت له دې مخکې ژمنه کړې وه چې د روان کال په وري میاشت کې به د شاه او عروس د اوبو بند د اوبو زېرمه کولو چارې پیل شي خو لا هم دغه بند ګټې اخیستنې ته نه دی سپارل شوی.
د اوبو د چارو د تنظیم ملي اداره وايي د شاه او عروس د اوبو د بند د جوړولو چارې بشپړې شوي او په نیږدې راتلونکې کې به ګټې اخیستنې ته وسپارل شي.
د اوبو د چارو د تنظیم ملي اداره وايي چې د بند راچاپېرې ځمکې د استملاک، امنیتي ستونزو او د جوړوونکو شرکتونو د تړونونو د ځینو شرایطو نه تطبیقولو د دغه بند کار ځنډولی و.
نظام خپلواک د یادې ادارې ویاند په دې اړه نن شنبه اپرېل ۲۴ (غويی۴) امریکا غږ ته وویل: "لویې پروژې وخت ته اړتیا لري. ستونزې شته خو بند به په راتلونکو اونیو کې ګټې اخیستنې ته وسپارل شي."
د شاه او عروس بند د جوړولو کار نهه کاله مخکې پیل شوی و. په هغه وخت کې خلکو ته ویل شوي وو چې د یاد بند د جوړېدو چارې به په دوه کلونو کې بشپړې شي.
د شاه او عروس بند د ۵۳ میلیونو امریکايي ډالرو په ارزښت جوړیږي چې د معلوماتو پر بنسټ هر کال به کابل ولایت شاوخوا پنځه میلیون وګړو ته د څښاک اوبه برابروي.
چارواکي وايي چې د شاه و عروس د بند ۹،۳ میلیون متر مکعب اوبه زېرمه کوي او کولی شي یو نیم میګاواټه برېښنا تولید کړي.
افغانستان کې د اوبو د مدیریت په برخې کې د لږ تر لږه د ۱۳ بندونو د جوړېدو کار روان دی.
یوه میاشت مخکې د افغانستان ولسمشر نیمروز ولایت کې د کمال خان بند پرانیسه. محمد اشرف غني په خپلو څرګندولو کې وویل چې له دې وروسته به بل هېواد ته وړیا اوبه ورنکړي.