د بخښنې نړیوال سازمان د ملګرو ملتونو له غړو هېوادونو څخه غوښتي چې په افغانستان کې د بشري حقونو د وضعیت لاخرابېدو مخنیوي په هدف اقدام وکړي.
یاد سازمان د یکشنبې په ورځ مارچ پنځمه (کب ۱۴) په خپل راپور کې د اندېښنې په څرګندولو سره ویلي چې په افغانستان کې د بشري حقونو وضعیت ورځ تر بلې مخ په خرابېدو دی او په خبره یې د طالبانو "بې رحمه سرغړونې" دوام لري.
دغه سازمان زیاته کړې چې په دې وروستیو کې د طالبانو حکومت لخوا په دغه هیواد کې د ښځو دحقوقونو ملاتړ یو شمېر فعالان، استادان او ځینې نور فعالان په غیر قانوني ډول نیول شوي دي.
د بخښنې نړیوال سازمان وايي، په داسې حال کې چې ټاکل شوې د افغانستان لپاره د ملګرو ملتونو د بشري حقونو شورا ځانګړی راپور ورکوونکی ریچارد بنیت نن د بشري حقونو شورا په ۵۲مه ناسته کې د افغانستان په اړه خپل راپور وړاندې کړي، د ملګرو ملتونو غړي هیوادونو باید په افغانستان کې معافیت ختم کړي او د طالبانو له لوري د زیانمنو شویو لپاره دې عدالت تامین کړي.
په راپور کې ویل شوي چې د ښځو د حقوقونو فعاله نرګس سادات، مدني فعال فردین فدايي، لیکوال ذکریا اصولي، خبریال مرتضی بهبودي، خبریال محمد یار مجروح او د پوهنتون استاد اسماعیل مشعل په دې وروستیو د طالبانو حکومت لخوا نیول شوي دي.
د بخښنې نړیوال سازمان ویلي چې د دوی د معلوماتو له مخې یوازې اسماعیل مشعل د طالبانو حکومت له بند څخه ازاد شوی او پاتې کسان لا هم ورسره بندیان دي.
یاد سازمان زیاته کړې چې دغه کسان په ښکاره د طالبانو حکومت په سیاستونو باندې د انتقاد له امله نیول شوي دي. په راپور کې د یادو کسانو د نیول کېدو په اړه انتقاد سره ویل شوي چې د دغه فعالانو نیول کېدو د لامل او ځای په اړه هم معلومات نه دي ورکړل شوي.
په دغه راپور کې د بخښنې نړیوال سازمان د عمومي منشي اګنس کالامار له قوله ویل شوي: "په افغانستان کې د بشري حقونو وضعیت ورځ تر بلې د خرابېدو په حال کې دی،د طالبانو بې رحماني سرغړونې هره ورځ دوام لري."
د بخښنې نړیوال سازمان همدارنګه په افغانستان کې د بشري حقونو سرغړونو د تثبیت لپاره د ځانګړي میکانیزم (حقیقت موندونکي ماموریت) رامنځته کېدو غوښتنه کړې ده.
تر دې مخکې په کابل کې د طالبانو حکومت لخوا د یو شمېر ښځینه معترضو مېرمنو د نیول کېدو راپورونه ورکړل شوي وو. په افغانستان کې د ملګرو ملتونو سیاسي استازولۍ یا (یوناما) مخکې د طالبانو حکومت لخوا د ښځو حقوقو د فعالینو د نیول کېدو په اړه اندېښنه ښودلې وه.
دا په داسې حال کې ده چې تر دې مخکې د افغانستان لپاره د ملګرو ملتونو د بشري حقونو شورا ځانګړي راپور ورکوونکي ریچارد بنیت او په افغانستان کې د ملګرو ملتونو ملتونو سیاسي استازولۍ یا (یوناما) هم د طالبانو له بند څخه د ښځو د حقونو د یادو فعالانو د خوشي کولو غوښتنه کړې وه.
ښاغلي بنیت تر دې مخکې ویلي و چې د افغان نجونو د تعلیم لپاره مبارزه او غږ پورته کول جرم نه دی او په خبره یې طالبان باید یاد فعالان خوشي کړي.
په داسې حال کې چې د طالبانو حکومت د بخښنې نړیوال سازما د دغه راپور په اړه تر دا مهاله څه نه دي ویلي، خو تر دې مخکې ویلي و چې دوی د اسلامي شریعت په چوکاټ کې د ښځو حقوقو ته ژمن دي.
دغه سازمان پخپل راپور کې د ځینو عکسونو او ویډیو په استناد ویلي چې په پنجشېر ولایت کې د طالب چارواکو لخوا ۸۷ کسان له محاکمې پرته پخپل سري توګه نیول شوي او لاسونه تړل شوي دي.
په راپور کې ویل شوي چې دغه ویډیوي او عکسونه د ۲۰۲۲ میلادي د مې او اګست میاشتو ترمنځ خپاره شوي دي.
د بخښنې نړیوال سازمان همدرانګه زیاته کړې چې عیني شاهدانو ورته ویلي چې یاد ملکي کسان له مقاومت جبهې سره تر نښتو وروسته د طالبانو لخوا نیول شوي دي.
د طالبانو حکومت تر دامهاله د بخښنې نړیوال سازمان د دغه تازه راپور په اړه څه نه دي ویلي، تر دې مخکې ورته راپورونه یوطرفه او له حقیقت څخه لرې" بللي دي.