د لاس رسي وړ اتصالات

د نړۍ په هرو دریو ښځو کې له یوې سره خشونت کیږي- راپور 


افغانستان په هغو هېوادونو کې راځي چې د ښځو سره خشونت په کې زیات دی

د روغتیا نړیوال سازمان په تازه راپور کې ویلي‌ دي ‌چې په نړۍ کې په هرو دریو ښځو کې یې یوه له فزیکي ‌او جنسي خشونت سره مخامخ ده.

د دغه راپور په اساس د ښځو سره فزیکي ‌او جنسي خشونت د کرونا وبا له پیل کېدو راهېسې زیات شوی دی.

دا راپور نن سه شنبه مارچ نهه (کب ۱۹) خپور شو. د روغتیا نړیوال سازمان له حکومتونو څخه غوښتي چې د ښځو سره زور زیاتی او اقتصادي ‌نابرابري چې له کبله یې ډېر کله ښځې د استفاده کوونکو خلکو لاس ته پریوځي، ختم کړي. ‌وايي حکومتونه باید د خشونت قربانیانو ته خدمتونه وړاندې کړي.

د روغتیا د نړیوال سازمان مشر تدروس ادهانوم ګیبریسوسوویل: « له ښځو سره خشونت په هر هېواد او فرهنګ شته او دا کار میلیونونه ښځې او کورنۍ زیانمنې کړي‌ دي.‌ دا پدېده د کروناویروس په موسم کې نوره هم زیاته شوې ده.»

د هغه تحقیق په اساس چې د ۲۰۰۰ میلادي کال څخه نیولې تر ۲۰۱۸ پورې د هېوادونو د ارقامو په اساس شوی دی، ښيي‌ چې د ۱۵ او ۴۹ کلونو ترمنځ‌ ۸۵۲ میلیون نجونې او ښځې په خپل ژوند کې جنسي او فزیکي خشونت تجربه کوي.

د تحقیق په اساس مېړونه او یا د ژوند شریک د ښځو سره د زور زیاتي‌ لوی عاملین بلل شوي دي چې په وروسته پاتې هېوادونو کې دا پېښې زیاتې دي. څېړونه وايي چې له ښځو سره د خشونت پېښې تر ورکړل شویو شمېرو زیاتې دي.

د دغه تحقیق یوې څېړونګېکلودیا ګارسیا مورینووویل: «دا شمېرې ټکان ورکوونکې دي او هېوادونو ته د خطر یو زنګ دی چې باید له ښځو سره د زور زیاتي د مخنیوي لپاره زیات کارونه وکړي.»

نوموړې رویټرز خبري اژانس ته ویلي دي چې د نړۍ په ځینو برخو کې تر نیمایي زیاتې ښځې له زور زیاتې سره مخامخ دي.

د شمېرو په اساس، کیریباتي، فیجي، پاپوا نیو ګیني، بنګله‌دیش، د کانګودموکراتیک جمهوریت او افغاستان د هغو هېوادونو په لست کې راځي چې له ښځو سره د خشونت ډېرې پېښې په کې کیږي.

د روغتیا نړیوال سازمان وايي‌ که څه هم په اروپا کې له ښځو سره خشونت کم کیږي‌،‌ بیا هم ۲۳ سلنه ښځې له زور زیاتي سره مخامخ دي.

XS
SM
MD
LG