د افغانستان د ټاکنو خپلواک کمېسیون وايي د دغه کمېسیون معلوماتي مرکز ته د پولیسو د ځانګړي قطعې سرتېرو د داخلېدو په اړه د عبدالله عبدالله په مشرۍ د «ثبات او همپالنې» ټاکنیز ټېم د ادعاو په اړه څېړنې کوي.
کمېسیون پر داسې مهال دا څرګندونې کوي چې «ثبات او همپالنې» ټاکنیز ټېم رئیس علي احمد عثماني د دوشنبې په ورځ د «تلې پر۲۹مه» وویل چې د کورنیو چارو وزارت ځانګړي پولیس د دغه کمېسیون د دارالانشاء د غړو په همکارۍ د قفل په ماتولو سره د رای ورکوونکو معلوماتي مرکز ته داخل شوي دي.
هغه وویل:"موږ وروسته تر هغه معلومات تر لاسه کړل، چې له امنیتي سرتېرو سره په همغږۍ د پېښې ځای ته ولاړو، د شپې ۱۰بجې د دیجتل سنټر دروازې ته ورسېدو، چې د هغه قفل مات شوی و، یو شمېر کسان چې له هغې جملې نه د کمېسیون امنیتي سلاکاران چې د ارشد معینیت لخوا یې رهنمايي او لارښونه کېده د ډیجیټل مرکز دروازې سره ولاړ و."
هغه دا کار ټاکنیزو ټېمونو ته د نه منلو وړ او د خلکو د رایو پر شفافیت د پولیسو د تېري په توګه یاد کړ.
خو د ټاکنو د خپلواک کمېسیون یوه ویاند ذبیح الله سادات بیا امریکا غږ ته وویل چې د کمېسیون د مشر تابه لخوا په دې اړه یو پلاوي ته د څېړنو دنده سپارل شوې ده.
نوموړي زیاته کړه چې وروسته به یې معلومات له رسنیو سره شریک شي.
هغه زیاته کړه:"د کمېسیون مشرتابه یو پلاوی ټاکلی تر څو په دې اړه څېړنې وکړي، چې د څېړنو تر پای ته رسېدو وروسته به یې پایلې له تاسو سره شریکې شي".
د افغانستان د کورنیو چارو وزارت ویاند نصرت رحیمي هم د ټاکنو کمېسیون په چارو کې د پولیسو د مداخلې په اړه اوازې بې اساسه بللي دي.
تر دا مهاله نورو ټاکنیزو ټېمونو په دې اړه څه نه دي ویلي دي.