په هرات کې سیمهییز چارواکي وايي چې د دغه ولایت د دیني عالمانو د شورا مرستیال مولانا کبابیاني د ناپېژندو وسلهوالو له خوا په ډزو وژل شوی دی.
د هرات د ارشاد، حج او اوقافو رئیس عبدالخالق حقاني د پنجشنبې په ورځ د جون درېیمه (غبرګولي ۱۳) امریکا غږ ته وویل چې پېښه نن سهار د هرات ولایت د انجیل ولسوالۍ په کبابیانو سیمه کې شوې ده.
ښاغلي حقاني زیاته کړه چې مولانا کبابیاني د سهار له لمانځه وروسته له جومات څخه خپل کور ته په لاره و چې ورسره روان یو ځوان ورباندې ډزې وکړې.
هغه وویل چې تراوسه د نوموړي د وژنې لامل او د بریدګر هویت نه دی څرګند شوی.
د هرات والي سید وحید قتالي پېښه تائید کړې او ویلي یې دي چې د سیمې استخبارات د دیني عالمانو او مخورو په وژنه کې لاس لري.
خو ښاغلي قتالي ونه ویل چې په دغو پېښو کې د کوم هېواد استخبارات دخیل دي.
تراوسه کوم چا یا ډلې د دغه برید مسولیت نه دی منلی.
