د فراه یو شمېر ځوانان چې له لوړو زده کړو برخمن دي وایي چې دوی له ګوزڼ ناروغۍ څخه د افغانستان د خلاصون لپاره، هر ډول خدمت ته چمتو دي.
دوی وایي چې له خپل هیواد او هیوادوالو سره د زیاتې خواخوږۍ له وجهې نه غواړي چې له دې وروسته افغان ماشومان د پولیو ویروس ښکار شي.
د فراه ولایت ځوان اوسیدونکي، خان محمد سعدي، امریکا غږ ته وویل: ”زه پدې ډیر اندیښمن یم چې لا هم د ګوزڼ ناروغۍ د افغان ماشومانو ژوند ګواښي، او سل په سلو کې غواړم چې د یادې ناروغۍ په له منځه وړلو کې برخه واخلم او د خپلو خلکو پر وړاندې خپل مسؤولیت او پور ادا کړم.“
د فراه ولایت بل ځوان اوسیدونکی، وحید غفوري، بیا خپل نظر داسې شریکوي: ”ټول خلک باید روغتیایي خدمتونو ته مساویانه لاسرسی ولري او تر څنګ یې باید د (وقایه تر درملنې غوره ده) اصل له پامه ونه غورځوي.“
نوموړی د ټولنې له بیلابیلو قشرونو غواړي چې له ځوانانو سره په ګډه کار وکړي، تر څو د پولیو ساري او ګواښوونکې ناروغي ژر تر ژره له افغانستان څخه محوه شي.
بل پلو، روغتیایي چارواکي هم د پولیو ضد مبارزه کې د ځوانانو رول مثبت ارزوي او له هغوی غواړي چې د عامه پوهاوي د پروګرامونو په رضاکارانه فعالیتونو کې پراخه برخه واخلي.
د فراه ولایت د عامې روغتیا ریاست د کتلوي معافیت د پروګرام آمر، ډاکټر نجم الدین بشیري، پدې هکله امریکا غږ ته وویل: ”د فراه ولایت مستعدو ځوانانو تل له موږ سره د پولیو په اړه د عامه پوهاوي په پروګرامونو کې همکاري کړې او موږ یې منندوی یو. هیله ده چې په راتلونکي کې هم خپلو همکاریو ته دوام ورکړي.“
روغتیا پالان ټینګار کوي چې د ګوزڼ ناروغي درملنه نلري، خو د وقایه یواځنۍ لاره یې ټولو له پنځو کالو څخه کم عمره ماشومانو ته د پولیو ضد واکسین تطبیق دی.
