په پاکستان کې دا وخت په دوو لوبغاړو نیوکې کیږي، یو یې په عمر اکمل د نڅا د کنسرټ د ویډیو د خپریدو نه وروسته او بل په یاسر شاه چې د یوې جینۍ سره یې د سندرې یوه ویډیو خپره شوه.
د اسټرالیا سره د پنځو لوبو د لړۍ د بایلولو نه وروسته د توپ اچونکي یاسر شاه یوه ویډیوه چې هغه پکې د یوې جینۍ سره سندره وایي، په ټویټر خپره شوه او په څو ساعتونو کې په زرگونو کسانو شریکه کړه.
په دغه ویډیو لدی کبله هم زیاتې نیوکې وشوې چې پاکستان د اسټرالیا په مقابل کې ډیره خرابه لوبه وکړه. دې لاندې ټویټ کونکې معظم شاه په یاسر شاه پورې ملندې کړې او وایي چې " یاسر شاه د اسټرالیا نه ماتې لمانځي."
د پاکستان د کرکټ روزونکي مکي ارتهر د اکمل او د یاسر د ویډیو گانو په اړه یوې خبرې غونډې ته وینا وکړله او وی ویل چې دواړه په خپلې غلطۍ پښیمانه دي.
ښاغلي ارتهر وویل چې یاسر شاه ورته ویلي دي چې یوې غیر ملکي نجونې ورنه خواست وکړ چې په دغه ویډیو کې ورسره برخه واخلي او هغه اوس پښیمانه دی.
د یادونې وړ ده چې په یاسر شاه جرمانه نه ده لگول شوې خو یواځې ورته خبرداری ورکړل شویدی. د دی نه مخکې د پاکستان کرکټ بورډ عمر اکمل د خپلو لوبو ۲۰فیصده فیس جرمانه کړی.
