د لاس رسي وړ اتصالات

تاجکستان او قرغیزستان له سختې جګړې وروسته ‌اوربند وکړ 


د تاجکستان او قرغزستان سرحدي

د تاجکستان او قرغیزستان ترمنځ له سختې سرحدي جګړې وروسته، چې لسګونه کسان په کې ووژل شول، اوربند وشو.

د دواړو هېوادونو چارواکو نن جمعه اپریل ۳۰ (غوايي۱۰) دا اوربند اعلان کړ.

جګړه له هغې وروسته پیل شوه چې تاجکستان د کوک تاش په سرحدي سیمه کې د اوبو د وېش لپاره امنیتي کیمرې ولګولې.

د قرغیزستان خلکو د تاجکستان د دغه کار مخالفت وکړ. په لومړي سر کې د دواړو هېوادونو د سرحدي سیمو اوسېدونکي له یو بل سره ونښتل خو ډېر ژر د سرحدي ځواکونو ترمنځ جګړه پیل شوه.

د تاجکستان او قرغیزسیتان ترمنځ سرحدي کرښې مشخصې نه دي او دا کار کله ناکله د دواړو هېوادونو ترمنځ شخړه پیدا کوي، په خاص ډول د اوبو دوېش پر سر ډېرې شخړې شوي دي.

د قرغیزستان د روغتیا وزارت وايي په دغې نښتې کې ۱۳ تنه وژل شوي او ۱۳۴ نور ټپي شويدي.

د تاجکستان چارواکو هم د اتو کسانو د وژل کېدو او ۳۰ نورو د ژوبلیدو خبر ورکړی.

د روسیې د بهرنیو چارو وزارت په دې شخړې خواشیني ښودلې او له دواړو غاړو یې غوښتي چې د ستونزو د دایمي حل لپاره هلې ځلې وکړي.

تاجکستان او قرغیزستان د روسیې په مشرۍ د ټولنیز امنیتي‌ تړون غړي‌ دي.

XS
SM
MD
LG